Газета «Народная газета» Прызёр «Белпошты» — прыхільнік «Народнай газеты» (№ 161 от 28.08.2012)

На РУП “Белпошта” падвялі вынікі другога этапу конкурсу-віктарыны “Як ты ведаеш родную літаратуру?”. Як і на папярэднім этапе, у лік прызёраў увайшоў адданы чытач “Народнай газеты”.

Конкурс-віктарына, прысвечаны Году кнігі, стартаваў 1 красавіка і прадоўжыцца да канца лістапада. Яго арганізатар — РУП “Белпошта”. Падтрымлівае спаборніцтва “Народная газета”.

— Конкурс стаў вельмі папулярны сярод людзей самага рознага ўзросту. Пра гэта сведчаць тысячы лістоў, якія зноў прыйшлі на наш адрас, — адзначыла старшыня камісіі конкурсу намеснік генеральнага дырэктара па камерцыйных пытаннях РУП “Белпошта” Таццяна Гвоздзева. — Удзельнікі дасылаюць не толькі дакладныя адказы на пытанні віктарыны, але і допісы пра сябе, пра свой любы куточак зямлі, пра незабыўныя творы беларускіх паэтаў і празаікаў.

Разам з адказамі цёплыя радкі пра “Народную газету” даслаў гімназіст Георгій Архіпаў з г. п. Шуміліна, што на Віцебшчыне. “Мы, браты Архіпавы, Георгій і Максім, разам з матуляй з задавальненнем чытаем газету, адказваем на заданні і наогул жывём з газетай ужо некалькі год. Цікавая і пазнавальная “Народная газета” падыходзіць кожнаму”.

Георгій, якому адказваць на пытанні дапамагаў брат, а разам з ім яшчэ дзевяць знаўцаў роднай літаратуры будуць адзначаны заахвочвальнымі прызамі ад РУП “Белпошта”. Сям’ю Архіпавых чакае прыемны сюрпрыз і ад рэдакцыі “Народнай газеты”.

А пераможцамі другога этапу творчага спаборніцтва сталі сапраўдныя эрудыты — жыхары горада Жлобіна Гомельскай вобласці Святлана Міхайлаўна Міраеўская і Віталь Мікалаевіч Гнётаў, а таксама Святлана Мядзведская з вёскі Капачы Мсціслаўскага раёна Магілёўскай вобласці. Яны атрымаюць граматы і сувенірныя выданні — кнігі паштовых марак Рэспублікі Беларусь, у якіх змешчаны ўсе паштовыя маркі і блокі, выпушчаныя ў абарачэнне за каляндарны год. У кожным такім наборы размешчана самая прыгожая марка па выніках апытання-конкурсу на лепшую паштовую марку.