Працягваецца падпісная кампанія на другое паўгоддзе. Зразумела, што яна заўсёды будзе мець больш плённы вынік, калі ў гэтым прымае ўдзел сама газета. А журналісты старэйшага беларускамоўнага выдання заўсёды імкнуцца быць у эпіцэнтры самых важных падзей і знаёміцца з жыццём нашых падпісчыкаў не падчас тэлефонных размоў, а выязджаючы "ў народ".
На Шклоўшчыне таксама любяць і паважаюць адзінае штодзённае беларускамоўнае выданне. У гэтым можна было пераканацца падчас размовы з начальнікам мясцовага вузла паштовай сувязі Таццянай Шынкевіч. Яна нагадала, што працуе на новым месцы работы нядаўна, але ж сувязь з прэсай і друкаванымі сродкамі масавай інфармацыі падтрымлівае даўно. Чаго толькі варты значны працоўны стаж у Магілёве на гарадскім аддзяленні сувязі №30! Менавіта тады, як зазначыла Таццяна Анатольеўна, яна даволі цесна пазнаёмілася са "Звяздою". На ад'езд мы пажадалі ёй далейшых поспехаў у працы на новай пасадзе. А добрым памочнікам для таго, каб зорка ўдачы свяціла па жыцці, павінен стаць настольны гадзіннік з фірменным лагатыпам газеты ў надзвычай арыгінальным афармленні.
Вянцом даволі працяглай паездкі па Магілёўшчыне можна лічыць сустрэчу з намеснікам старшыні Магілёўскага аблвыканкама Валерыем Малашкам і дырэктарам Магілёўскага абласнога філіяла РУП "Белпошта" Аленай Котавай. Цёплая размова, поўнае паразуменне, у тым ліку важных стратэгічных задач, што стаяць перад рэспубліканскімі СМІ і газетай "Звязда", у прыватнасці. І мы разам з уласным карэспандэнтам у гэтым рэгіёне Ілонай Івановай, якая, да таго ж, выступіла сапраўдным штурманам падчас выбару аўтамабільнага маршруту па абласным цэнтры, накіраваліся ў бок газетнага павільёна № 20, які належыць ААТ "Магілёўсаюздрук". І выбар такі быў невыпадковы: па выніках сумеснага конкурсу газеты "Звязда" і рэспубліканскага "Саюздруку" пад назвай "Лепшаму кіяскёру — звяздоўскі прыз" кіяскёр Валянціна Сільчанка выйграла электрачайнік. І хоць з-за цяперашняга спякотнага надвор'я тэма гарачага чаю ці кавы саступае размовам пра халодны морс ці пітную ваду, але ж прыз Валянціне Якаўлеўне прыйшоўся даспадобы. У любым выпадку — падарунак па заслугах, ды і ў гаспадарцы спатрэбіцца.
Фінальны акорд паездкі праз Быхаўшыну, Клічаўскі і Кіраўскі раёны пацвердзіў наша меркаванне. Нават у сённяшнім няпростым эканамічным становішчы, калі многія людзі будуць вагацца: зэканоміць на газеце на карысць аднаразовага паходу ў магазін па прадукты ці ўсё ж не развітвацца з любімым выданнем і быць у курсе ўсіх актуальных падзей, што тычацца кожнага адукаванага чалавека, — трэба ладзіць выязныя сустрэчы. Бо асабістыя кантакты і сустрэчы "ўжывую" не заменяць ніякі адміністрацыйны рэсурс ці пісьмовыя просьбы.