Зараз працягваецца падпісная кампанія на 2-е паўгоддзе 2011 года. Зразумела, што мы павінны актыўна ўдзельнічаць у працэсе інфармавання насельніцтва пра ўсё тое, аб чым піша газета. І адбываюцца такія "палітінфармацыі" падчас паездкі — тады мы ўручаем каштоўныя прызы, якія выйгралі нашы падпісчыкі ў штоквартальнай латарэі.
Чарговы выезд быў запланаваны на Міншчыну. Хоць і рэдка так здараецца, але ж бывае, што адразу некалькі каштоўных падарункаў прыпадае на адзін раён. На гэты раз ільвіная доля прызавых накіроўвалася ў Валожын. Дарэчы, наша даўняя падпісчыца Соф'я Лямбовіч з вёскі Пілюжына ўжо паспела ў рэдакцыі атрымаць электрапрас. А вось каляровы тэлевізар "Віцязь" зачакаўся свайго гаспадара.
Праўда, спачатку наш маршрут ляжаў у Дзяржынскі раён. Пасля размовы з начальнікам мясцовага вузла паштовай сувязі Людміла Шыманскай стала зразумела: цяжкасці сёлетняй падпісной кампаніі вядомыя — людзі стаміліся ад імклівага росту цэн, валютнай ліхаманкі і незразумелага ажыятажу на многія прадукты харчавання. Але ж духоўную ежу, да якой можна смела аднесці і газету "Звязда", наўрад ці чым можна замяніць. Таму Людміла Аляксандраўна выразіла ўпэўненасць, што свайго чытача ў рэгіёне "Звязда" не павінна страціць. Асабліва, калі ёсць такія паштальёны, як Вольга Мігура з аддзялення паштовай сувязі "Волма". Вядома ж, што магчымасць сустрэцца з нашай гераіняй сам-насам мы не маглі ўпусціць. Вольгу Канстанцінаўну прыезд звяздоўцаў на пошту не здзівіў. Яшчэ б: штодня яна абслугоўвае некалькі соцень дамоў і кватэр, жыхары якіх атрымліваюць перыёдыку, у тым ліку і старэйшае беларускамоўнае выданне. Таму пра "Звязду" яна ведае шмат чаго і мае самае непасрэднае дачыненне да яе тыражу. Падчас фотасесіі паштальён АПС "Волма" Вольга Мігура трымалася ўпэўнена і не выклікала ніякіх сумненняў, што на яе ўчастку будзе ўсё ў парадку.
Аптымістычнай была і сустрэча ў Валожыне. Кіраўнік РВПС Зігмунд Лужынскі не без долі жарту зазначыў, што наша газета зачасціла ў гэты раён. Адметна, што не з пустымі рукамі. І на гэты раз у якасці галоўнага прыза значыўся тэлевізар. "Блакітны экран" выпаў на долю Васіля Германа, які дружыць з газетай больш за дзесяць гадоў. Ён падкрэсліў, што калі-некалі высылаў запоўнены купон на розыгрыш прызоў. Але ж дагэтуль фартуна так яму не ўсміхалася. Васіль Фёдаравіч выказаў меркаванне, што яму пашанцавала таму, што апускаў квіток у паштовую скрыню ў апошні дзень гульні. Сваёй радасцю пасля правядзення розыгрышу ён падзяліўся з жонкай Аленай Уладзіміраўнай. А падчас наша прыезду ў Валожын кампанію шчасліўчыку ва ўласнай кватэры склалі начальнік гарадскога аддзялення сувязі №1 Ганна Фарботка і інструктар РВПС па падпісцы Ганна Мамонька. Віншуем!
Са святочным настроем наша паездка працягнулася па Вілейскім і Маладзечанскім раёнах. Нягледзячы на тое, што буйныя прызы сюды не трапілі, мы пастараліся пакінуць у аддзелах ідэалогіі і вузлах паштовай сувязі добры настрой, які быў падмацаваны шэрагам фірменных календароў, сувеніраў і падарункаў.