Пресса о нас / 05.03.11

Газета «Звязда» Па краіне — з веснавым настроем (№43 за 5 марта 2011 года)

Знаходжанне ў Гомелі ўмясціла ў сябе плённыя сустрэчы з кіраўніком аддзела ідэалагічнай работы аблвыканкама Анатолем Кацілам і дырэктарам Гомельскага філіяла РУП "Белпошта" Галінай Цярэшчанкай. Ну, а потым пачаўся цэлы россып прызоў практычна па ўсіх без выключэння раёнах вобласці. Напачатку наш аўтамабіль завярнуў у вёску Страдубка Лоеўскага раёна, дзе каляровага тэлевізара "Віцязь" зачакаўся Мікалай Фядосенка, які пачаў выпісваць "Звязду" яшчэ ў 1956 годзе! Нават у свае восемдзесят з хвосцікам Мікалай Клімавіч цікавіцца навінамі і інфармацыяй, што друкуецца ў газеце, не забываючы пра сваю гаспадарку, якую складаюць сабака і куры. У яго яшчэ хапае сіл і здароўя, каб заўсёды цёпла па-бацькоўску сустрэць на парозе свайго дома сваіх двух сыноў з дачкой і чацвярых унукаў.

З улікам паважанага ўзросту падпісчыка самую непасрэдную дапамогу ў дастаўцы тэлевізара на дом аказалі начальнік АПС Страдубкі Наталля Арэшнікава і кіраўнік справамі сельскага выканкама Іна Шарапава <І>(фота 1).

У самім Лоеве на галоўным вузле паштовай сувязі каштоўны прыз у выглядзе пыласоса быў пакінуты паштальёну аддзялення паштовай сувязі №1 Алене Ігнаценцы, які яна выйграла ў рамках сумеснага конкурсу газеты "Звязда" і РУП "Белпошта". Паколькі паштальён — чалавек заўсёды заняты, то за прызам прыехаць не так проста. У нашым выпадку такі варыянт прадугледжваўся, таму дастаўку бытавой тэхнікі на неабходны адрас узялася арганізаваць інструктар па падпісцы Лоеўскага РВПС Алена Гулай(фота 2).

Далейшы маршрут "Звязды" ляжаў у Брагін, дзе электрачайнік асабіта ў рукі атрымала кіяскёр "Саюздрука" Таццяна Масавец. У Хойніках мы пакінулі электрапрас для паштальёна з вёскі Храпкова Таццяны Цішкевіч. Начальнік мясцовага вузла паштовай сувязі Святлана Марчанка (на фота) падкрэсліла, што вельмі прыемна адзначаць, што старэйшае беларускамоўнае выданне знаходзіць магчымасць не толькі разыгрываць прызы, але і дастаўляць іх на месца. У такім жа добрым тоне прайшла размова на Мазырскім раённым вузле паштовай сувязі з нядаўна назначаным начальнікам Інай Глушко. А вось старшы інструктар аддзела падпіскі мясцовага РВПС Іна Наўрось(фота 3), прымаючы электрафен і электрапрас для сваіх паштальёнаў, выказала ўпэўненасць, што падпіска на Мазыршчыне на газету "Звязда" будзе і надалей праходзіць на высокім арганізацыйным узроўні.

Вянцом паездкі па Гомельшчыне можна лічыць візіт у Нароўлю, Ельск, дзе свой электрачайнік выйграла падпісчыца са стажам Яўгенія Цяслюк. На спідометры аўтамабіля ўжо набегла тысяча кіламетраў, калі за вокнамі аўто засталіся Лельчыцы і Жыткавічы, куды мы таксама паспелі заглянуць з візітамі ветлівасці і пакінуць людзям памятныя сувеніры ад "Звязды", падарункі, добры вясенні настрой.