Пресса о нас / 04.03.11

Асноўны "ўдар" быў скіраваны на Гомельшчыну і абласны цэнтр, дзе меркавалася пакінуць ільвіную долю цяперашняга прызавога фонду. Ваяж быў пачаты з Мар'інай Горкі. Візіты ветлівасці ў райвыканкам і галоўную пошту пакінулі ўпэўненасць, што да старэйшага беларускамоўнага выдання тут ставяцца з вялікай павагай, таму з падпіскай у раёне будзе ўсё добра. Яшчэ большы аптымізм напаткаў нас у Асіповічах, а гэта ўжо Магілёўшчына, дзе нашай даўняй падпісчыцы Марыі Сімановіч з вёскі Усцеж мы прывезлі каляровы тэлевізар "Віцязь", які яна выйграла ў штоквартальнай звяздоўскай латарэі. З улікам таго, што Марыя Міхайлаўна ўжо даўно размяняла дзявяты дзясятак, то за каштоўным прызам прыехаў малады чалавек па імені Ігар — муж унучкі Святланы.

Ён жа паведаміў, што бабуля нават у такім паважаным узросце вельмі любіць "Звязду". Зрэшты, за свой працяглы падпісны стаж яна ўжо паспела выйграць у нашай газеце наручны гадзіннік і электраміксер. Ці то жартам, ці то ўсур'ёз начальнік мясцовага РВПС Валерыя Матузава сказала, што "Звязда" апошнім часам зачасціла ў Асіповічы з добрымі прызамі, таму ў самы бліжэйшы час асабіста аформіць на яе падпіску.