Газета «Звязда» Выезд «у людзі» па-багатаму (№38 за 26 февраля 2011 года)

Выязны сезон па ўручэнні прызоў нашым падпісчыкам, паштальёнам і кіяскёрам "Звязда" пачала, не чакаючы змяншэння лютаўскіх маразоў. У першы "падпісны паход" па краіне рушылі адразу з двума каляровымі тэлевізарамі "Віцязь", а таксама шэрагам іншых каштоўных прызоў. За некалькі дзён камандзіроўкі ўдалося наведаць адразу 14 раёнаў, большая частка якіх прыйшлася на Гродзеншчыну.

Праўда, пачаць прыйшлося з Міншчыны. Пасля візіту ветлівасці ў Стоўбцы наш маршрут ляжаў на Нясвіж — на пошту, дзе свой тэлевізар чакала Наталля Шыманская з пасёлка Навагарадзейскі. У кампаніі з начальнікам мясцовага РВПС Аляксеем Бурдзюком і галоўным спецыялістам аддзела ідэалогіі Нясвіжскага райвыканкама Ганны Сарокінай падпісчыца "Звязды" разгаварылася. Наталля Міхайлаўна прызналася, што за чвэрць стагоддзя падпіснога стажу на старэйшае штодзённае беларускамоўнае выданне неаднойчы адсылала картку для ўдзелу ў розыгрышы. Праўда, удача ўсміхнулася ў першы раз і адразу на ўсе 32 зубы.

Адразу цэлы стос падарункаў — 2 электрафены і 1 электрапрас — прыйшлося пакінуць на Навагрудскім раённым вузле паштовай сувязі. Прычым лаўрэатамі звяздоўскага прызавога фонду сталі выключна паштальёны, якія дабіліся добрых вынікаў у арганізацыі падпіскі на газету на 1-е паўгоддзе 2011 года. З гэтай нагоды начальнік Навагрудскага РВПС Святлана Дзядовіч у кампаніі з кіраўніком аддзела ідэалогіі райвыканкама Аляксандрам Гундарам паспрыялі ў правядзенні "фотасесіі" сярод шчасліўчыкаў. Адметна, што нам яшчэ ўдалося павіншаваць з назначэннем на пасада кіраўніка раёна і пагутарыць аб справах надзённых з Анатолем Маркевічам. Што называецца, удачы вам, Анатоль Мечыслававіч, на новай пасадзе!