Падпіска-2010
Набліжэнне калядных і навагодніх свят для многіх нашых чытачоў традыцыйна звязана і з уручэннем прызоў, якія выпалі на долю падпісчыкаў у штоквартальнай звяздоўскай латарэі.
Адзін з апошніх сёлета выездаў "у народ" быў прымеркаваны да ўручэння каляровага тэлевізара "Віцязь" нашаму даўняму падпісчыку ў вёскі Стаі Лепельскага раёна Івану Карбоўскаму. Зразумела, што наш падпісны маршрут не мог абысціся толькі адным рэгіёнам.
Хоць Іван Максімавіч і не змог асабіста прыняць каштоўны падарунак, але ж на выручку прыйшлі супрацоўнікі паштовай сувязі. Начальнік АПС Стаі Людміла Быкава ( на здымку злева) вельмі станоўча ахарактарызавала новаспечанага ўладальніка тэлевізара, зазначыўшы, што Іван Максімавіч выпісвае "Звязду" вельмі даўно, таму фартуна яму ўсміхнулася недарэмна. У самы бліжэйшы час, заверыла Людміла Антонаўна, "блакітны экран" будзе ўручаны адрасату.
Цёплыя словы ў адрас свайго земляка гучалі і з вуснаў намесніка начальніка Лепельскага раённага вузла паштовай сувязі Галіны Стрэльчанкі. Прыемна, што яна з задавальненнем паўдзельнічала ў святочнай "фотасесіі", падкрэсліўшы, што суперпрызы ад нашай газеты даволі часта выйграюць жыхары Лепельшчыны.
Нам жа хацелася пажадаць, каб удача нікога не абыходзіла бокам. І "Звязда" ў гэтым гатова паспрыяць кожнаму.
Газета «Звязда» (№250 за 21 декабря 2010 года)