Газета «Звязда» «Віцязь» — да Дня медыка (№118 за 19 июня 2010 года)

Менавіта такі прыз ад нашай газеты быў уручаны нашай даўняй падпісчыцы з Ляхавіцкага раёна Ірыне Гатоўчыц, які яна выйграла ў звяздоўскай латарэі. Прыемна, што каштоўная рэч прыйшла як нельга своечасова. Сутнасць у тым, што Ірына Вячаславаўна працуе старшай медсястрой у Крывошынскай псіхіятрычнай бальніцы і вельмі ўсцешылася тэлевізару, які мы прывезлі якраз напярэдадні Дня медыцынскага работніка. Наваспечаная ўладальніца каштоўнага прыза расказала журналісту "Звязды", што і яе калегі па працы вельмі абрадаваліся такой ўдачы. Пэўна, што хто-ніхто з іх у самы блізкі час стане таксама падпісчыкам найстарэйшай беларускамоўнай газеты. У пашырэнні чытацкай аўдыторыі на "Звязду" выказаў пажаданне і начальнік аддзела ідэалагічнай работы Ляхавіцкага райвыканкама Міхаіл Дыдышка, які з задавальненнем павіншаваў зямлячку і ўручыў каштоўны прыз.

Зрэшты, уручэнне тэлевізара "Віцязь" быў практычна нашым амаль заключным акордам у паездцы — пасля Ляхавічаў заставаліся яшчэ Баранавічы. А пачынаўся чарговы звяздоўскі ваяж з Міншчыны. Напачатку традыцыйны візіт ветлівасці ў Дзяржынск, потым планавы ва Узду. Тут ужо зачакалася была свой каштоўны прыз Ніна Апраніч. Яна прызналася, што шмат гадоў выпісвае газету, "Звязда" ёй вельмі падабаецца. А пасля таго, як кухонны камбайн стане пастаянным памочнікам на яе кухні, узрадавалася Ніна Уладзіміраўна, попыт на найстарэйшае беларускамоўнае выданне сярод суседзяў і знаёмых значна ўзрасце. Кампанію ў "фотасесіі" ёй склаў муж Васіль.

Добры настрой і шэраг рэкламна-інфармацыйнай прадукцыі мы пакінулі ў Нясвіжы, дзе газета "Звязда" займае традыцыйна моцныя пазіцыі. І на гэты раз, запэўнілі паштавікі, пастараемся не падкачаць ў падпісцы.

Апошнім пунктам маршруту па Мінскай вобласці значыўся Клецк. Тут таксама адбылася цёплая размова з кіраўніцтвам мясцовай пошты і райвыканкама. Брэстчына пачыналася з Ганцавічаў. Кіраўнік "мясцовай вертыкалі" Уладзімір Міхайлавіч Столяр вельмі добра выказаўся пра нашу газету, зазначыўшы, што "Звязда" — часты госць раёна, хоць быў не супраць, каб яе журналісты і яшчэ часцей бывалі тут у службовых камандзіроўках. Ён пажадаў удачы ў звяздоўскай латарэі падпісчыкам раёна. Тым больш што нагода была: на галоўным паштовым аддзяленні мы дамовіліся напярэдадні аб уручэнні каштоўнага прыза — электрачайніка — жыхарцы горада Ліліі Віннік. Яна, нягледзячы на паважаны ўзрост, яшчэ выкладае ў Ганцавіцкай сярэдняй школе № 3 мову і літаратуру. Таму сустрэча са звяздоўцамі прайшла вельмі цёпла. У гэтым паспрыяла начальнік аддзела ідэалагічнай работы мясцовага райвыканкама Лідзія Занька.

Заканчэнне чарговага выезду па падпісцы адбылося ў Баранавічах. Тут таксама паабяцалі, што пра нашу газету не забудуць ні ў якім разе.

Газета «Звязда» (№118 за 19 июня 2010 года)