Газета «Белорусская нива» Да адрасата - і ў дождж, і ў свята (№187 за 9 октября 2009 года)

Беларуская пошта канкурэнцыі з боку Інтэрнэту не баіцца. Яна… пасябравала з ім! Сучасныя інфармацыйныя тэхналогіі — сёння на службе ў нашых паштароў. І будучыня РУП “Белпошта”, як лічыць намеснік міністра сувязі і інфарматызацыі Рэспублікі Беларусь Ніна Гаўрылава, — менавіта ў развіцці сучасных інфармацыйных тэхналогій.

Дзякуючы Інтэрнэту, аплаціць уласную кватэру, тэлефон, ваду і газ для нашых грамадзян не праблема з любога кутка краіны. Больш таго, зараз у РУП “Белпошта” ўводзіцца сістэма дыстанцыйнай аплаты паслуг праз мабільны тэлефон ці банкаўскія пластыкавыя карткі. У паштовым аддзяленні цяпер можна аплаціць і падаткі. І нават набыць чыгуначны білет.
Распаўсюдзілася так званая гібрыдная пошта. Кліенту дастаткова прынесці на пошту рукапісны ліст, там яго апрацуюць і адправяць праз электронную пошту ў іншае аддзяленне паштовай сувязі. А ўжо там пісьму зноў нададуць “папяровы выгляд” і даставяць адрасату. Такім чынам, шлях ліста звычайна скарачаецца на некалькі дзён.
Сёння супрацоўнікі беларускай пошты працуюць над яшчэ адным важным праектам у сферы інфармацыйных тэхналогій, які дазволіць нашым суайчыннікам нават у адаленых ад сталіцы абласных цэнтраў і раёнах мець доступ да дзяржаўнага інтэрнэт-рэсурсу “Электронная Беларусь”, у тым ліку і праз сетку аддзяленняў паштовай сувязі. Тэхнічныя магчымасці гэта дазваляюць. Па словах Ніны Сямёнаўны, на гэты момант усе аддзяленні паштовай сувязі ў рэспубліцы камп'ютарызаваны, створана больш за тысячу пунктаў калектыўнага доступу ў Інтэрнэт. Ёсць такія і ў аграгарадках. Дарэчы, у сельскай мясцовасці, нягледзячы на развіццё інфармацыйных тэхналогій, паштальён застаецца, бадай, самым жаданым чалавекам у хаце. Ён і пісьмо прынясе, і падпіску на газету ці часопіс аформіць, і плацяжы прыме. І нават муку з цукрам ды іншымі таварамі, калі будзе ў тым патрэба, заказчыку прынясе.
Так што са з'яўленнем Інтэрнэту менш працы ў беларускіх паштароў не стала. Дарэчы, толькі летась яны прынялі і даставілі 280 мільёнаў штук адпраўленняў пісьмовай карэспандэнцыі, амаль пяць мільёнаў пасылак, 110 тысяч адпраўленняў міжнароднай паскоранай пошты. Між іншым абмен карэспандэнцыяй з краінамі свету для беларусаў стаў магчымы з уступленнем Беларусі ў Сусветны паштовы саюз. Сёння адзначаецца 135 гадоў з моманту яго заснавання, а таксама — Сусветны дзень пошты. У нашай краіне святкуюць супрацоўнікі ўсіх шасці абласных філіялаў РУП “Белпошта”, аўтатранспартнай вытворчасці, філіялу “Вузел спецыяльнай сувязі”, вытворчасці “Мінская пошта”. Але гэта не значыць, што паштальёны будуць адпачываць. Яны па-ранейшаму гатовы дастаўляць лісты, віншавальныя паштоўкі і газеты ў нашыя дамы.
Дарэчы, за мяжой беларускую пошту лёгка пазнаюць па марках.
- Мы імкнемся да таго, каб на нашых знаках паштовай аплаты ўсе надпісы былі на беларускай мове, — гаворыць Ніна Гаўрылава. — Добра разумеем, што маркі — гэта своеасаблівы “таварны знак” нашай краіны і адлюстроўваем на іх у першую чаргу беларускія помнікі гісторыі, культуры, архітэктуры. Імкнемся перадаць самабытнасць краіны. Дарэчы, серыя марак пад назвай “Беларускае адзенне” аказалася вельмі папулярнай.
Вялікім попытам у замежных калекцыянераў карыстаюцца і маркі з выявамі нашых жывёл, раслін. Толькі ў мінулым годзе беларуская пошта рэалізавала марак ажно на 170 тысяч долараў. Чым, між іншым, зрабіла свой унёсак у прыток валюты на Беларусь.
Газета «Белорусская нива» (№187 за 9 октября 2009 года)