Геадэзічная дуга Струвэ

 

14 верасня 2017 года Міністэрства сувязі і інфарматызацыі Рэспублікі Беларусь выпускае ў абарачэнне паштовы блок «Геадэзічная дуга Струвэ».

 

Марка друкавалася ў РУП «Бабруйская ўзбуйненая друкарня імя А. Ц.  Непагодзіна».

Дызайн Я.Бядонік.

 

Геадэзічная дуга Струвэ — унікальны помнік навукі і тэхнікі XIX ст., які ствараўся з мэтай вызначэння памеру і формы Зямлі і аб’ядноўвае 10 краін.

Дуга складаецца з 265 геадэзічных пунктаў, якія былі закладзены ў перыяд з 1816 па 1855 гг., і носіць імя свайго заснавальніка — вядомага рускага астранома і геадэзіста таго часу — Васіля Струвэ.

Непасрэдна палявымі даследаваннямі займаўся ваенны геадэзіст генерал Карл Тэнер. Пад яго кіраўніцтвам у геадэзічных работах удзельнічаў наш суайчыннік Іосіф Ходзька — вучоны, геадэзіст і тапограф, які праводзіў трыянгуляцыйныя работы на захадзе Латвіі, у Літве, Гродзенскай і Мінскай губернях.

З 31 пункта, закладзенага на тэрыторыі Беларусі ў XIX ст., сучасныя беларускія геадэзісты знайшлі і ўзнавілі 19.

У 2005 г. 34 пункты Геадэзічнай дугі Струвэ ўключаны ў Спіс аб’ектаў сусветнай спадчыны ЮНЕСКА, 5 з іх размешчаны на тэрыторыі сучаснай Беларусі.

 

Праект падрыхтаваны ў супрацоўніцтве з Дзяржаўным камітэтам па маёмасці Рэспублікі Беларусь.

 

У дзень выпуску паштовага блока ў абарачэнне ў аддзяленні паштовай сувязі № 3 Ашмян Гродзенскай вобласці будзе праводзіцца спецыяльнае гашэнне на канверце «Першы дзень».

 

З больш падрабязнай інфармацыяй можна азнаёміцца тут.