100 гадоў беларускай дыпламатычнай службе

22 студзеня 2019 года Міністэрства сувязі і інфарматызацыі Рэспублікі Беларусь выпускае ў абарачэнне паштовы блок «100 гадоў беларускай дыпламатычнай службе».

Дызайн Т.Кузняцовай.

Блок друкаваўся ў РУП «Бабруйская ўзбуйненая друкарня імя А. Ц. Непагодзіна».

22 студзеня беларускай дыпламатычнай службе спаўняецца 100 гадоў. У гэты дзень далёкага 1919 года ў газеце «Звязда» было змешчана першае публічнае паведамленне аб пачатку дзейнасці Камісарыята па замежных справах ССРБ і вызначана месца яго размяшчэння — горад Мінск. Менавіта гэту дату прынята лічыць пачаткам гісторыі знешнепалітычнага ведамства нашай краіны.

За 100 гадоў у структуры змянілася многае, але задачы засталіся ранейшымі: абараняць нацыянальныя інтарэсы, забяспечваць бяспеку і годна прадстаўляць Беларусь на міжнароднай арэне.

На блоку — эмблема Міністэрства замежных спраў Рэспублікі Беларусь, у супрацоўніцтве з якім падрыхтаваны праект. У аснове спецштэмпеля — пячатка Паўнамоцнага прадстаўніцтва БССР у РСФСР.

У дзень выпуску паштовага блока ў абарачэнне ў аддзяленні паштовай сувязі № 1 Мінска (магазін «Філатэлія», вул. Маскоўская, 16) будзе праводзіцца спецыяльнае гашэнне на канверце «Першы дзень».

 

З больш падрабязнай інфармацыяй можна азнаёміцца тут.