Міжнародная пісьмовая карэспандэнцыя

Адпраўленні пісьмовай карэспандэнцыі падзяляюцца на:

• паштоўкі (простыя, заказныя);
• пісьмы (простыя, заказныя, з аб’яўленай цэннасцю);
• дробныя пакеты (простыя, заказныя);
• бандэролі (простыя, заказныя);
• секаграмы (простыя, заказныя);
• аэраграмы (простыя);
• мяшкі “М” (простыя, заказныя).

Адпраўленні пісьмовай карэспандэнцыі ў залежнасці ад хуткасці апрацоўкі і перавозкі падзяляюцца на:

• прыярытэтныя адпраўленні — адпраўленні, якія перавозяцца самым хуткім шляхам і апрацоўваюцца ў прыярытэтным парадку;
• непрыярытэтныя адпраўленні — адпраўленні, якія перавозяцца наземным шляхам.

Рэкамендуецца дадаваць слова «Prioritaire» («Прыярытэтнае») або «Lettre» («Пісьмо») на адрасным баку адпраўленняў, якія па сваім аб’ёме або ўмовах запакоўкі маглі б быць прынятыя за іншыя адпраўленні, аплачаныя па паніжаным тарыфе.

Заказныя адпраўленні пісьмовай карэспандэнцыі

Заказныя адпраўленні пісьмовай карэспандэнцыі перасылаюцца рэгіструемым парадкам і толькі прыярытэтным шляхам.

Ніякіх асаблівых умоў у адносінах да формы, запакоўкі або напісання адраса для заказных адпраўленняў не патрабуецца. Адпраўленні з адрасам, напісаным алоўкам або з указаннем толькі ініцыялаў атрымальніка, да перасылкі заказным парадкам не дапускаюцца.

Для заказных мяшкоў «М» або дробных пакетаў запаўняецца мытная дэкларацыя CN22.

Перавагі:

• пацвярджэнне падачы (квітанцыя);
• прыпіска да дакументаў на ўсім шляху праходжання;
• уручэнне заказнога адпраўлення пісьмовай карэспандэнцыі адрасату пад роспіс.

Парадак уручэння: заказныя адпраўленні ўручаюцца адрасату пад распіску.

Міжнародныя адпраўленні пісьмовай карэспандэнцыі могуць прымацца для дастаўкі «З нарачным», «З паведамленнем пра атрыманне», «Уручыць ва ўласныя рукі», пры ўмове, што ў краіне прызначэння аказваецца дадзеная паслуга.

• Міжнародныя рэгіструемыя паштовыя адпраўленні прымаюцца толькі з простым паведамленнем пра атрыманне. Пры здачы ў аддзяленне паштовай сувязі міжнароднага рэгіструемага паштовага адпраўлення адпраўшчык запаўняе бланк паведамлення пра атрыманне CN07. Установа прызначэння вяртае самым хуткім шляхам (простым парадкам) дапоўненае належнымі звесткамі паведамленне пра атрыманне непасрэдна адпраўшчыку.
• Заказныя адпраўленні і адпраўленні з аб’яўленай цэннасцю могуць прымацца з адзнакай «Уручыць ва ўласныя рукі» (A remettre en main propre). Адпраўленні з адзнакай «Уручыць ва ўласныя рукі» прымаюцца з паведамленнем пра атрыманне CN07 і павінны мець выразную адзнаку «A remettre en main proper» на адрасным баку адпраўлення.
• Адпраўленні «З нарачным» павінны мець на адрасным баку адзнаку «Expres». Па іх прыбыцці ва ўстанову дастаўкі адпраўленні дастаўляюцца спецыяльным кур’ерам на дом адрасату. Уваходная карэспандэнцыя «Expres» («З нарачным») дастаўляецца па тэрыторыі Рэспублікі Беларусь звычайным парадкам, паколькі дадзеная паслуга ў Рэспубліцы Беларусь не аказваецца.